Description

Perjuangan PGRI, ti jaman revolusi tug nepi ka jaman reformasi taya reureuhna. Geus kajeueung ku balarèa kumaha ketak PGRI dina nangtungkeun ajèn-inajèn dunya atikan. Beunang disebutkeun katara, karampa, tur karasa ku sakumna bangsa Indonèsia, wabilhusus ku para guru. Tug dina taun 1994 Presiden Soeharto medalkeun Keputusan Presiden (Keppres) nomer 78, sabagè wujud apresiasi Pamarèntah ka PGRI, ku cara hari lahir PGRI dijieun tetengger sabagè Hari Guru Nasional (HGN). Nu matak dina raraga mapag poè guru, antara HUT PGRI jeung HGN sok “pagègèyè”.

Teu bisa dipondah, salah sahiji conto perjuangan PGRI di jaman reformasi nyèta ku marajian gubragna Undang-Undang Sistem Pendidikan Nasional (UU Sisdiknas nomer 20/2003) nu “nangtukeun” alokasi dana pendidikan 20% tina APBN di luar belanja pegawai. Ogè PGRI nu paèh-poso merjuangkeun Undang-Undang nomer 14/2005 ngeunaan Guru jeung Dosèn (UUGD), sahingga ngalahirkeun Tunjangan Profesi Guru (TPG).  Balukarna ti harita guru mimiti diarambeuan; diajènan sajajar jeung profesi sèjèna kayaning tèknokrat, advokat, insinyur, dokter, jsb. Sarèatna nya ku PGRI, sagala bangbaluh guru saeutik-saeutik dikurangan.

Nilik kana pedaran di luhur, sanajan perjuangan PGRI geus loba nu kapetik hasilna, tapi PGRI tetep ngarasa yèn merjuangkeun nasib guru can tepi ka pangparatana alias tacan anggeus, masih gantung teureuyeun. Contona nasib guru honorèr (sukwan) tug ka kiwari teu puguh juntrunganana, nu tangtu bakal terus diperjuangkeun ku PGRI. Ku èta hal, minangka kareueus ka PGRI, dina raraga milangkalana nu ka-81 jeung HGN ka-32 2026, kuring ngajak rempug gawè ka CEO Nimu Press, Lia Laèli Muniroh, sangkan edisi kelas carpon #4 ayeuna dihususkeun jejerna (tema utama) ngeunaan guru jeung PGRI.

Penulis             : Ade Fathurohim, Lia Laeli Muniroh, Sri Nuryani, Fitri Yantini, Duden Ramdan, Ida Darwati, Dedeh Nurhasanah, Emi Hamidah, Lutpiah Nur Azizah, Reni Ratnawati, Dadang Hidayat, Hana Wulandari, Tajudin, Asarach, Nurdin Herdiana, Linlin Nurlina, Ade Sumarna

Editor                : Deasy Silvya Sari

Penyunting        : Rani Oktavia

Penata Sampul  : Alma Zahra Tunnisa

Penata Letak     : Tim Niaga Muda